Soffía Dögg Garðarsdóttir klæðist kjólum allt árið um kring og blómakjólar eru í sérstöku uppáhaldi hjá henni. Hún segist vera svakalegur krummi inn við beinið því hún gleðst yfir öllu sem glitrar og á erfitt með að standast fagurt skart og fallega fylgihluti.
Soffía Dögg er mörgum að góðu kunn fyrir sjónvarpsþættina Skreytum hús á Stöð 2, þar sem hún fegrar og frískar upp á hin ýmsu heimili. Hún heldur úti samnefndri vefsíðu, Facebook-hópi og Instagram-reikningi þar sem hún gefur góð ráð og hugmyndir að fallegri híbýlum, án þess að það kosti hálfan handlegg. Soffía hefur vakið athygli fyrir smekklegan klæðnað, enda hefur hún mikinn áhuga á tísku.
„Stíllinn minn einkennist fyrst og fremst af blómakjólum, þeir eru mitt aðalsmerki. Mér finnst líka geggjað að vera stundum í gallabuxum við kjól og dressa hann aðeins niður. Satt að segja er ég með endalaust kjólablæti, sem ekki sér fyrir endann á. Ég er eins og prinsessan sem átti 365 kjóla, nema ég hlæ bara að henni að láta það duga,“ segir hún með bros á vör.
Soffíu Dögg finnst engin ástæða til að hafa kjóla til spari heldur sé um að gera að nota þá dagsdaglega.
Þægindin í fyrirrúmi
Soffía kýs helst að klæðast þægilegum fötum og nennir ekki að vera í gallabuxum sem henni finnst þröngar og stífar. „En ef þær eru góðar þá elska ég að vera í þeim. Ég er líka mjög hlynnt því að nota fötin mín og „trúi ekki“ á sparikjóla. Þegar ég er í vinnunni verða blómakjólar oft fyrir valinu, en þegar ég sit fyrir framan tölvuna, sem er þá iðulega seint á kvöldin, er ég gjarnan í kósíbuxum og peysu,“ segir Soffía, sem kaupir sér oft föt fyrir sérstök tilefni. „En þegar því tilefni er lokið þá fer flíkin yfirleitt bara í almenna notkun. Lífið er of stutt til þess að nota ekki fötin sín og njóta þess bara.“
Soffía brosir þegar hún er spurð hvort hún eyði miklum peningum í föt á mánuði. „Ég áskil mér rétt til þess að svara ekki þessari spurningu til þess að vernda hjónabandið,“ svarar hún glettnislega.
„Ég er eins og prinsessan sem átti 365 kjóla,“ segir Soffía Dögg.
Eins og krummi
Soffía á sér ekki neinn sérstakan uppáhaldshönnuð og er almennt opin fyrir því sem henni þykir fallegt, óháð hönnuði eða tískumerki. „En ég er nokkuð viss um að Habanera-kjólarnir hennar Andreu í Hafnarfirðinum séu þannig að þær sem fari í þá fíli sig eins og skvísur og það kann ég svo sannarlega að meta. Í gegnum árin hef ég verslað mikið í Vila og Vero Moda. Cocos í Grafarholti er dásamleg og einnig Motivo á Selfossi. Brá verslun er með ofsalega fallega kjóla. Svo kíki ég alltaf rúntinn í Smáralindinni og sér hvað er til.“
Fylgihlutir eru henni að skapi, enda segist Soffía bókstaflega elska bling og skartgripi. „Inni í mér býr svakalegur krummi og ef eitthvað glitrar þá er ég kát. Ég á mikið af skarti, til dæmis undurfagra skartinu hennar Lovísu, hjá ByLovisa.is. Svo eru flott stígvél, belti og töskur alveg þarna líka á listanum,“ segir hún.
Soffía Dögg segist elska bling og skartgripi. „Ég á mikið af skarti, til dæmis undurfagra skartinu hennar Lovísu, hjá ByLovisa.is.“
Brúðarkjól breytt í fermingarkjól
Þegar Soffía er spurð hvort hún eigi flík sem hún hafi ekki getað látið frá sér því hún tengist minningum kemur í ljós að svo er. „Já, þær eru nokkrar. Ég er með brúðarkjólinn minn í kassa úti í bílskúr og kem seint til með að geta látið hann frá mér. Það getur stundum komið sér vel að geyma föt, sem eiga sér sögu. Sem dæmi geymdi ég brúðarkjólinn hennar mömmu minnar og dóttir mín fermdist í honum í fyrra, næstum sextíu ára gömlum kjól. Svo á ég ómerkilegri hluti sem ég geymi og tek stundum upp og fæ hláturskast, eins og gallapilsið sem ég notaði og er svo stutt að ég myndi eflaust nota það sem belti í dag.“
Flestöll föt sem Soffía er hætt að nota ganga í endurnýjun lífdaga. „Ég byrja á að bjóða fötin á línuna dóttir-frænkur-vinkonur. Eftir það fara fötin beint í Konukot, Rauða krossinn eða á einhverja staði þar sem þau nýtist áfram. Eins er sniðugt að hafa í huga að Konukot og fleiri staðir taka líka við snyrtivörum og öðru slíku,“ segir Soffía.
Myndirnar tók Kristín Valdimarsdóttir. Instagram: kristinvald_photography
Grein úr Fréttablaðinu 22.júlí 2021