Greinin birtist fyrst á Vísi.is – smella hér til þess að skoða!

„Við erum að leita að einhverju sem grípur augað og vantar smá ást og alúð“

Sylvía Rut Sigfúsdóttir skrifar 23. janúar 2021 11:00

„Það er alveg ótrúlega spennandi að fara af stað aftur,“ segir Soffía Dögg Garðarsdóttir, þáttastjórnandi Skreytum hús. Önnur þáttaröð fer af stað í mars og leitar hún nú að þátttakendum fyrir hönnunarþáttinn.

„Það er á vissan hátt þægilegt að fólk viti betur hvað við erum að fara að gera og treysti því enn betur ferlinu. Það er komin reynsla á þetta og maður lærir af hverju einasta verkefni, þannig að ég treysti bara alveg á að þetta verði alltaf betra og betra,“ segir Soffía í samtali við Vísi.

Fyrsta þáttaröðin var sýnd á Vísi í vetur og hlaut mjög góð viðbrögð.

„Allt ferlið var ótrúlega skemmtilegt og þetta gekk allt bara mjög vel. Af einhverjum ástæðum fannst mér þetta ekkert vera „erfitt“ eða stressandi, ég var bara meira spennt og bara hlakkaði til þess að takast á við hvert rými. Svo var ég svo heppin að þátttakendur voru hver öðrum skemmtilegri og ég naut þess í botn að finna út með þeim hvað væri sem „vantaði“ til þess að gera plássin þeirra eins og þau vildu helst hafa þau.“

Kvörtunarbréf frá ungum aðdáendum

Soffía segir að viðbrögðin við þáttunum hafi verið ótrúlega jákvæð og dásamleg. Hún hefur í mörg ár haldið úti síðunni Skreytum hús og samnefndum Facebook hópum og Instagram síðu en þetta var hennar fyrsti þáttur.

„Það rigndi yfir mig skemmtilegum skilaboðum frá fólki sem var að hafa virkilega gaman að og eina kvörtunarefnið sem ég heyrði af, var að sumir vildu hafa þættina lengri. Þannig að við lítum á svoleiðis kvartanir sem hrós,“ segir Soffía og hlær.

„Ég held að það sem kom mér kannski langmest á óvart var það hversu margir krakkar voru að hrífast með.Það var ótrúlega skemmtilegt að finna fyrir og sjá. Ég á orðið unga aðdáendur hér og þar. 

Ein góð vinkona mín á barnabarn sem er búinn að ákveða það alveg að ég er besta frænka hans, sem ég er að sjálfsögðu orðin og hann er sennilegast besti auglýsandinn minn. Segir öllum sem hann hittir að þeir verði að horfa á þættina Skreytum Hús. 

Eins fékk ég myndbandupptökur frá krökkum að horfa á, alveg alsæl og sömuleiðis bréf frá ungum krökkum sem „kvörtuðu“ yfir frammistöðu foreldra sinna í herbergisskreytingamálum. Mér fannst þetta allt svo skemmtilegt.“

Erfitt að bíða eftir myndavélunum

Í hverjum þætti tók Soffía Dögg fyrir eitt verkefni þar sem einu eða fleirum rýmum var breytt og þau skreytt eins og henni einni er lagið. Hún á erfitt með að velja hvaða breyting var skemmtilegust.

„Það er náttúrulega ekki hægt að gera upp á milli „barnanna sinna“. Hvert rými hafði alveg hundrað prósent sinn sjarma og eins og áður sagði voru þátttakendur yndislegir og þess vegna var þetta svona skemmtilegt. En hins vegar þykir mér ótrúlega vænt um Hlaðgerðakotsbreytinguna, því að maður fann svo vel hvað þörfin var mikil. Að fá að koma að slíku er alveg ómetanlegt.“https://cdn.iframe.ly/api/iframe?url=https%3A%2F%2Fwww.visir.is%2Fg%2F20202046816d&key=6bbe5b2ccff11618fc9161e373e22354&v=1&app=1

Soffía viðurkennir að það hafi alltaf verið áskorun að stoppa sig af og þurfa að bíða með að byrja þangað til myndavélarnar voru farnar að rúlla.

„Ég er alveg þannig að þegar verkið liggur fyrir og öll púslin eru á borðinu, þá vil ég bara byrja strax. En maður lærir fljótt að það er betra að hinkra, og það er alveg nauðsynlegt að kveikja að minnsta kosti þrisvar sinnum á hverjum lampa, svo að rétt skot náist.“

Með þáttaröð tvö af Skreytum hús er að langmestu leyti verið að halda áfram undir sömu formerkjum.

„Þetta var að virka vel og snillingarnir hjá Obbosí sem leikstýra og klippa þættina til eru alveg geggjaðir. Það er ótrúlega skemmtilegt að vinna með þeim og þeir eiga svo mikinn heiður skilið fyrir hvernig þeir gerðu þetta allt saman. Maður lærir fljótt að það skiptir öllu máli að vinna með góðu fólki.“

Eitthvað sem grípur augað

Soffía lærði ýmislegt af fyrstu þáttaröðinni og fékk líka ábendingu sem hún er að íhuga að taka til greina fyrir nýju þættina.

„Dóttir mín segir að ég þurfi að minnka aðeins foreldrabrandarana eða pabbabrandarana,“ segir Soffía og hlær.

„Eins og þegar ég hélt á fíl og sagðist fíla hann.“

Tekið er á móti umsóknum fyrir nýju þáttaröðina á netfangið skreytumhus@stod2.is og leggur Soffía mikla áherslu á að fólk sendi myndir með af rýminu því það auðveldar allt ferlið.

En hverjir geta tekið þátt?

„Þeir sem eru með pláss sem þeir þurfa að fá hjálp með og hafa vilja að vera í mynd. Það er nefnilega þannig að það fylgir sjónvarpsþáttum að þurfa að koma fram og myndavélin þarf að vera vinur þinn. 

Við erum að leita að einhverju sem grípur augað og vantar smá ást og alúð, stundum þarf bara glöggt gestauga til þess að sjá eitthvað út. 

En það er oft þannig að bara um leið og ég sé mynd af rými, þá sé ég það bara fyrir mér hvernig ég myndi hafa þetta, þannig að myndir eru sterkasta leiðin til þess að ná í gegn.“

Ástríðan orðin að atvinnu

Tökurnar fara fram í febrúar og mars. Aðspurð hvað fólk ætti að vita áður en það sækir um svarar Soffía glottandi að þetta sé eins og að fá fellibylinn Soffíu inn í hús. Umsækjendur eigi að vera opnir fyrir breytingum og tilbúnir í framkvæmdir, því það lendi alltaf eitthvað á heimilisfólkinu hvort sem það er að mála eða annað.

Þættirnir fara í loftið í lok mars og verða sýndir vikulega hér á Vísi og Stöð 2+ sem var áður Maraþon.

„Ég er bara ótrúlega þakklát fyrir alla þessa dásamlegu hlýju og jákvæðni sem ég mæti frá fólki.Að ókunnugir gefi sér tíma til þess að stoppa mann og hrósa er bara alls ekki sjálfgefið,“ segir Soffía.

„Ég bý líka svo vel að fyrirtækin sem ég er að vinna með í þessu eru búin að vera með mér í samstarfi í langan tíma og það er bara magnað að fá tækifæri til þess að samtvinna þetta allt saman og að fegrun heimilis, sem hefur verið mitt áhugamál og ástríða frá því að ég man eftir mér, sé orðið að atvinnu minni, og núna sjónvarpsþáttum – það er bara magnað. 

Ég er enn að vinna þetta eins og ég gert frá upphafi, að finna ódýrar en sniðugar lausnir, að endurnýta og endurvinna gamalt og bara umfram allt að finna það fallega í því sem er í kringum okkur. 

Þannig að áður en þetta fer allt saman í gang, þá langar mig bara að segja aftur takk fyrir. Takk fyrir að lesa inni á www.skreytumhus.is, að horfa á þættina og Instagram, að skrifa mér falleg skilaboð og bara almennt að umlykja mig í þeirri sannfæringu að það er svo mikið til af góðu fólki í kringum mann,“ segir Soffía að lokum.

Þeir sem hafa áhuga á að taka þátt í þessari þáttaröð geta sent tölvupóst með myndum af rýminu á netfangið skreytumhus@stod2.is.