SkreytumHús-litirnir…

…eru núna fáanlegir hjá Slippfélaginu.

Ég fæ fjöldan allan af spurningum um litina og ætla því að gera hérna einn póst, sem vísar á hina póstina sem hægt er að sjá þessa liti í “notkun”.  Því miður eru tveir þeirra sem ég á ekki enn nógu góðar myndir af – en það eru Mjallhvít og sá Gammelbleiki.  En það verður vonandi bót á því sem fyrst…

Orginalinn – SkreytumHús-liturinn:

Hér er póstur sem er tileinkaður honum, nóg af myndum og meira til.

Fyrstur verður auðvitað að vera SkreytumHus-liturinn – sem er búin að vera á veggjunum okkar síðan 2008.  Við erum með þennan lit á forstofunni, inni í alrýminu á nokkrum veggjum og í svefnherberginu.

Liturinn er mjög fallegur og umfram allt mjög hlýr.  Hann er grábrúnn, mjög mikil blanda af báðum tónunum.

Slippfélagið lýsir honum svona:
Það er engin tilviljun að Skreytum hús liturinn okkar er einn sá allra vinsælasti hjá okkur núna í innimálningu. Hann gefur þessa hugljúfu mjúku stemmingu en er í senn sérstaklega elegant og klassískur. Hann er blandaður með gráum, brúnum og toppaður með oxírauðu sem gefur honum þessa hlýju sem einkennir litinn. Liturinn fer einstaklega vel inní stofu, á sjónvarpsvegginn, í eldhúsið, í svefnherbergið eða á rúmgaflsvegginn.

 

Mosagrár

Ég er persónulega mjög hrifin af þeim mosagráa.  Hann er, eins og SkreytumHús-liturinn, mjög breytilegur eftir birtu og tíma dags.  Hann er ekki eins dökkur og SH-liturinn, en hann er svo endalaust hlýr og fallegur.  Vinkona mín var að mála allt sitt hús í honum núna um daginn, og það var bara nóg að setja litinn á veggina og allt var orðið hlýlegt og heimilislegt.  Þannig að ég mæli óhrædd með honum.

Tónarnir í honum eru stundum svo gráir, stundum brúndrappaðir og á öðrum stundum nánast grænir.

Hér eru póstar þar sem hann kemur fyrir – smella og hér smella..

Dömugrár

Liturinn er ljósgrá með örlitlum rauðroða tón í sér sem gefur honum ákaflega mjúka og huggulega stemmingu.

Ég hef sjálf lýst honum sem nánast pastelgráum – en það eru mjög svona bleikir tónar í honum, þannig að hann fer sérlega vel með mjúkum pastellitum.

Liturinn var sérblandaður í herbergið hjá dóttur minni, sem hefur í gegnum árin verið kölluð daman hérna á blogginu – og því varð það úr að skíra hann í höfuðið á henni.

Þessi litur er sérstaklega “mjúkur” – ef það er lýsingarorð sem hentar lit 🙂

Hér er hægt að finna pósta með þessum fallega lit – smella og hér – smella, og svo auðvitað stelpuherbergið – smella.

Gammelbleikur

Sá gammelbleiki er t.d. þessi fullkomni bleiki í barnaherbergið, án þess þó að vera of-bleikur. Hann er líka svo endalaust fallegur.

Gauragrár

Annar litur sem varð til þegar ég var að láta blanda hinn fullkomna lit inn í herbergið hjá litla manninum, eða gaurnum mínum.  Því ber hann þetta nafn.

Gauragrár er mjög hreinn grár litur. Hann er ekki yfirþyrmandi og lætur alla aðra liti njóta sín til fullnustu.

 Hann fer t.d. mjög vel með dökkbláum og rauðum, sem voru litir sem ég vissi að ég myndi vilja vera með inni í herberginu.

Hér er t.d. hægt að skoða nokkra pósta – smella.

Kózýgrár

Ég hreinlega ELSKA þennan lit.  Skrifstofuherbergið er ekki stórt, það er bara 2,80×2,47m, ég þori að fullyrða að herbergið virkar ekki minna núna – þrátt fyrir að vera í svona “dökkum” lit.  Það sem er best við þennan lit, er sú staðreynd að þegar ekkert var inni í herberginu – annað en auðvitað borðplatan sem er veggföst – þá var herbergið samt svona hlýtt og kózý og tók utan um mann.  Sum sé kózýgrár!

Það er komið rúmt hálft ár síðan við máluðum, og ég er enn jafn sæl með litinn.  Mér finnst hann bara svo ótrúlega notalegur og taka svo vel utan um mig hérna inni – mér finnst sem sé góð svona veggjaknús.

Þið getið sé frekari myndir af honum t.d hér og hér…

Mjallhvít

Þetta er þessi ekta hvíti! Þið vitið, sem er ekki of hvítur og ekki of gulur.  Heldur bara þessi fullkomni félagi með öllum hinum litunum.  Ekki kaldur og bara alveg réttur 🙂

Pastelgrænn

Sá pastelgræni var eitt sinn í herbergi dömunnar.  Það er að segja, eftir bleika tímabilið hennar og áður en sá dömugrái kom á veggina.  Þetta er litur sem fer ótrúlega vel í sálina, hann er eitthvað svo róandi og notalegur.  Alls ekki yfirþyrmandi og mjög hlýr.

Hægt er að skoða pósta t.d. hér með honum – smella og svo hérna – smella.

Mynta

Þessi er alveg hreint dásamlega ferskur og fallegur.  Svona fullkomin blanda af ljóóóósbláu með smá hint af grænu í – sem sé mynta.

Ég skellti honum á vegg í þvottahúsinu og hann breytti alveg hreint ótrúlega miklu, það var bara eins og smá sól færi að skína inni í þessu gluggalausa herbergi.

Hér er pósturinn sem þið getið skoðað með þvottahúsinu – smella.

Svo er ég sérlega stolt að segja ykkur frá því að núna getið þið nálgast bækling yfir alla litina hjá Slippfélaginu – og hann er alveg ótrúlega fallegur, þó ég segi sjálf frá.

Þið fáið líka auðvitað enn fríar prufudósir hjá þeim Slippfélaginu, ásamt því að fá afslátt í gegnum SkreytumHús.

Svo er ótrúlega flottur leikur í gangi á Facebook-síðu Slippfélagsins, þar sem hægt er að vinna málningu á herbergi – OG málarann sem vinnur verkið fyrir þig (þó má ekki eiga málarann, færð hann bara lánaðann í jobbið).  Endilega smella hér til þess að taka þátt.

Verð að segja að ég er mjög stolt af þessu öllu, og auðvitað sérstaklega þakklát þessum frábæru móttökum sem litirnir hafa fengið hjá ykkur ♥

Smella hér til þess að skoða SkreytumHús-litina á síðu Slippfélagsins.

Smella hér til þess að fara á Facebook-síðu Slippfélagsins.

ps. þætti vænt um að þið mynduð smella á like-hnappinn ef þið höfðuð gaman af póstinum!