DIY – Jóladagatalið í ár

fyrir jólin í fyrra sá ég þessa mynd frá Pottery Barn

Seinna á mínum bloggrúnti þá rakst ég á þetta verkefni hjá Katie sem er með síðuna Bower Power (sem er líka þrælskemmtileg).

Dagatalið hennar Katie hjá Bower Power

Þannig að í ár var ekkert annað í stöðunni en að henda sér í að gera sjálf svona jóladagatal. Allt sem að notað í verkið var til hérna heima:

– Spónaplata
– Efni að eigin vali
– Heftibyssa
– Naglar
– Blöð að eigin vali
– Jólaskraut að eigin vali

Ég kíkti bara á það tréverk sem að til var í skúrnum og blikkaði svo bóndann til þess að saga niður eina plötu fyrir mig í stærð sem að ég var sátt við, í þessu tilfelli 77cm x 105 cm. Af því að hann er svo viljugur hjálpari og vill gera allt svo vel þá festi hann líka spýtur aftan á plötuna til þess að gera hana þykkari og veglegri.

Ég átti gróft efni sem ég ákvað að nýta og heftaði það á plötuna, passaði það að reyna að gera hornin slétt og fögur. Síðan, af því að bóndinn er svoddan yndi, þá fór hann í að negla fyrir mig 24 nagla eftir miklum mælingum og pælingum. Þetta er svo hárnákvæmt hjá honum að það hálfa hefði verið mikið meira en nóg

Næst er að taka A4 blöð og skipta þeim í 3 hluta, skrifa eina tölu á hvert blað og þá var ekkert eftir annað en að hengja upp það skraut sem mig langaði að hafa á. Ég var líka búin að prenta úr tölustafina frá 1-24 en okkur fannst þetta bara vera meira heimilislegt svona skrifað.

Þetta er skemmtileg leið til þess að hengja upp skautið fyrir jól sem að venjulega færi ekki upp fyrr en á Þorláksmessu þegar að jólatréð er sett upp. Mér datt líka í hug að skipta síðan út skrautinu þegar að jólakortin fara að berast og hengja þau upp á dagatalið – þá er líka komin skemmtileg leið til þess að njóta þeirra betur.

Skrautið kemur úr ýmsum áttum, sumt er föndur eftir litla leikskólasnillinginn okkar – og það er það sem okkur þykir vænst um og mest gaman að sjá hversu stolt hún er þegar hún sér handverkið sitt þarna (eins og jólakötturinn stóri á hægri myndinni).

Litlu tréjólasveinarnir sem að standa hjá fjaðratrjánum er eftir okkur hjónin, þegar við vorum sjálf lítil snuð á sitt hvorum leikskólanum. Greinilega verið staðlað leikskólaverkefni sjötíu og eitthvað.