Oggulítið – DIY…

…því að suma daga er maður ekki stórtækur!

Ég sýndi ykkur gestabækurnar núna um daginn, sjá hér, en svo hélt ég áfram að fikta og spá, og einn morguninn – á meðan að strákarnir mínir böðuðu sig í morgunsólinni tók ég til starfa…

…þrjár litla krukkur úr Góða.  Svo sem sætar, en engu að síður keyptar til þess að breyta þeim smá.

Sorry krukks…

…því var tekið til óspilltra málanna að mála.  Notaðist við föndurmálninguna frá henni vinkonu minni Martha Stewart – við erum ótrúlega nánar, og ég kalla hana bara Mörtu frænku (svipað og hún frænka mín Betty (Crocker))…

…eftir að hafa málað þá notaði ég sandpappírssvampinn (svo mikil snilld) frá Litalandi og “skemmdi” hér og þar, svona til að gera þetta meira rustic…

…og síðan var að mestu leiti notast við úrklippur og afganga.  Fyrsta krukkan er með afgang af gjafapappír sem ég setti í bakið á skáp (sjá hér) og mynd sem ég prentaði út, önnur er með diskamottunum úr Söstrene, snilld!!

…og svo er þessi bleika með skrapppappír sem ég átti…

…til þess að festa þetta á notaði ég bara límlakk, svipað og Modpodge…

…og eins og áður sagði – bara lítið og einfalt…

…síðan notaðist ég við smá skreyterí á þennan með gráa pappírinum, og setti svona límblúnduborða neðst (eins og ég hef notað á löberinn í eldhúsinu (sjá hér)…

…og týndi svo bara til smá demanta, smá límperluskraut og lítið blóm frá Söstrene…

…og þannig urðu Jesper, Kasper og Jónatan til…

…en þeir eru ósköp sætir…

…sér í lagi fyrir svona lítið punt í stelpuherbergi…

…eða bara á baðið…

…en það gerir líka mikið að hafa farið með sandpappírinum á þær…

…fá meiri karakter…

…þetta má náttúrulega skreyta bara algerlega að vild og eftir hentugleika…

…síðan fyrst ég var að vinna með afganga, þá klippti ég þessa uglu til (eins og ég gerði boðskort út hérna um árið, sjá hér).  En þetta er sniðugt í föndur með krökkunum, boðskort eða bara sem skraut í ramma, eða hangandi í glugga…

…annars langar mig sérstaklega að þakka fyrir öll fallegu orðin ykkar í kjölfarið af Heimsókninni.

Mikið eruð þið yndislegar!

Svo segi ég bara góða helgi krúttin mín, njótið þess að dúllast eitthvað og bara hafa það kózý ♥